کابل ټکی کام (دوشنبه، ۱۰ وری، ۱۴۰۴ل)
نړیوال بشري حقونو سازمان وايي چې پاکستاني ځواکونو د پکتیکا، خوست او کونړ په سرحدي سیمو کې د درنو وسلو او بېهدفه هاوانونو په ډزو ملکي مېشتځایونه په نښه کړي، چې له امله یې لږ تر لږه ۱۷ ملکي وګړي ټپیان شوي او ګڼ کورنۍ د ناامنۍ له امله خپلې سیمې پرېښودو ته اړ شوې دي.
سازمان د دغو بریدونو پراخ مالي او رواني زیان ته په اشارې ویلي چې دا کار د نړیوال بشري قانون ښکاره سرغړونه ده او د عاجلو څېړنو او اقدام اړتیا لري.
یاد بنسټ له پاکستاني ځواکونو غوښتي چې د افغانستان په سرحدي سیمو کې پر ملکي خلکو بریدونه ژر تر ژره ودروي او د نړیوالو بشري قوانینو درناوی وکړي.
د بشري حقونو د څار سازمان همدارنګه له ملګرو ملتونو غوښتنه کړې چې د دغو سرغړونو په اړه څېړنه وکړي او د مسئول کسانو پر ضد لازم اقدام ترسره کړي.
سازمان وایي بشري مرستندوی ادارې باید بېځایه شويو او ټپیانو کورنیو ته بیړنۍ مرسته ورسوي، او د جګړې پر مهال د ښځو او ماشومانو ژوند خوندي ساتل باید لومړیتوب ولري.
