کابل ټکی کام (پنجشنبه، ۱۳ وری، ۱۴۰۵ل)
پاکستانی خبریال طاهر خان وايي، د افغانستان او پاکستان د پلاوو ترمنځ د چین په کوربتوب پلان شوې خبرې لا نه دي پيل شوې زياتوي د پلاوي یوه غړي د پنجشنبې په سهار شاوخوا پنځو بجو په یو لنډ غبرګون کې ورته ويلي چې “تر اوسه هېڅ ناسته نه ده ترسره شوې.” د هغه د څرګندونو پر مهال په چین کې د وخت له مخې د سهار اته بجې وې.
په تېرو څو ساعتونو کې ګڼو خبریالانو او رسنیو راپور ورکړی و چې د دغو خبرو ناسته د چهارشنبې په ورځ شوې او بېپایلې پاتې شوې، خو د پلاوي غړي دغه ادعاوې رد کړې. نوموړي ټینګار وکړ چې تر دې دمه رسمي ناسته نه ده شوې.
یو شمېر خبریالانو په ټولنیزو رسنیو کې ورته ادعاوې خپرې کړې وې، خو د مذاکراتي پلاوي غړي بیا وایي چې ټول خپاره شوي معلومات ناسم دي او د غونډې د دقیق مهال په اړه به وروسته معلومات شریک شي.
