کابل ټکی کام (یکشنبه، ۳۰ وری، ۱۴۰۵ل)
د اسلامي امارت ویاند مولوي ذبیح الله مجاهد ویلي، د ویاند دفتر او د حکومت د اطلاعاتو او رسنیو مرکز په ګډو هڅو داسې معلوماتي بانک او باوري سرچینه رامنځته کړې چې د اسلامي امارت د بېلابېلو لاسته راوړنو، پرمختګونو او رسمي معلوماتو د خپرولو ترڅنګ به رسنیو ته هم اسانه لاسرسی برابر کړي.
نوموړي دا څرګندونې د «پرمختګ» ویبسایټ، د افغانستان د رسنیو معلوماتي لارښود او د ارګ پاڼې د سلمې ګڼې د پرانېستې مراسمو پر مهال وکړې.
مجاهد وویل، د دغو نوښتونو په رامنځته کېدو سره به د مخالفو تبلیغاتو د مخنیوي زمینه برابره شي او د اسلامي امارت لاسته راوړنې به په میاشتني، ربعوار او کلني ډول په منظم ډول محاسبه او ثبت شي.
د اسلامي امارت ویاند همداراز د امارتي ادارو له مسئولینو او ویندویانو وغوښتل چې د حکومت د رسنیو مرکز سره د خپلو اړوندو وزارتونو او ادارو لاسته راوړنې او معلومات پر وخت شریک کړي، څو دا بهیر لا پیاوړی او اغېزناک شي.
هغه له رسنیو هم وغوښتل چې له یادو سرچینو څخه د معتبرو معلوماتو په توګه ګټه واخلي او د حکومت د اطلاعاتو او رسنیو مرکز سره خپلې مشورې، نظرونه او همکارۍ شریکې کړي.
مجاهد ټینګار وکړ چې د «پرمختګ» ویبسایټ بریالیتوب، د تبلیغاتو مخنیوی او اغېزناکه اطلاع رسونه هغه مهال ښه تضمینېدای شي چې اړوندې ادارې او رسنۍ په ګډه همکاري او همغږي ولري.
