کابل ټکی کام (دوشنبه، ۳۱ وری، ۱۴۰۵ل)
د راپورونو له مخې، د ایران یوه کانتینربر بېړۍ چې «توسکا» نومېږي او له چین څخه ایران ته روانه وه، د عمان خلیج په اوبو کې تر برید لاندې راغلې ده.
د ایران د تسنیم خبري اژانس ویلي، دا پېښه څو ساعته مخکې شوې، خو د برید څرنګوالي په اړه لا بشپړ معلومات نه دي ورکړل شوي.
په همدې حال کې، راپور زیاتوي چې ایراني ځواکونو د یاد برید په غبرګون کې د امریکا ځینې پوځي بېړۍ د بېپیلوټه الوتکو په وسیله په نښه کړې دي.
تر اوسه د دواړو پېښو د احتمالي تلفاتو او زیانونو په اړه کره جزییات نه دي خپاره شوي.
ایراني چارواکو ټینګار کړی چې د هېواد پر ګټو هر ډول برید به بې ځوابه پاتې نه شي او تهران چمتو دی د هر ګواښ پر وړاندې «باالمثل ځواب» ورکړي.
