کابل ټکی کام ۱۰حمل/۱۳۹۵، احمدالله مهاجر
نن سې شبنه د امریکایي پوځ یوه ایف ۱۶ جنګي الوتکه د بګرام له هوايي ډګر څخه د الوتلو پر مهال ولوېده.
د متحدو ایالتونو د دفاع وزارت ویاند پیټر کوک هم د واشګنټن ایګزا میانر ورځپاڼې ته د خپلې الوتکې لوېدل تأیید کړي دي، او زیاته کړې یې ده، چې د افغانستان په وخت ماښام مهال ۸:۳۰ بجې د امریکايي پوځ یوه ایف ۱۶ جنګي الوتکه غورځېدلې ده.
کوک همدا راز دغې ورځپاڼې ته ویلي دي، چې د الوتکې پیلوټ د طبي پرسونل له لورې تر معاینې لاندې دی.
د روسیې سپونټینک خبري اژانس د امریکا د پوځ له قوله لیکلي دي، چې پیلوټ له الوتکې څخه د پراشوټ په مټ ځان وژغوره، چې اوس تر معاینې لاندې دی، تر څو د غورځېدلو پر مهال ټپي شوی نه وي.
د یادولو ده، چې د نوي کال په رارسېدو په افغانستان کې امریکايي ځواکونو یو ځل بیا د افغان ځواکونو د طالبانو پر خلاف جګړې پیل کړي دي.
