کابل ټکی کام (يکشنبه، ۱۳ غویی، ۱۴۰۵ل)
د عامې روغتیا وزارت وايي، د دغه وزارت وزیر مولوي نور جلال جلالي د هېواد شمال زون ته د سفر پر مهال په جوزجان، سمنګان او کندوز ولایتونو کې د نږدې ۳۰۰ میلیونه افغانیو په ارزښت د ۷ روغتیايي پروژو د بنسټ ډبرې کېښودې او د یو شمېر نورو پروژو د تطبیق چارې یې پرانیستې.
د وزارت په خبرپاڼه کې راغلي، په جوزجان کې د منګجیک ولسوالۍ د عمومي روغتون د جوړېدو پروژه د څه باندې ۵۰ میلیونه افغانیو، د آقچې ولسوالۍ د ۵۰ بستریز روغتون د پاتې چارو بیا پیل د ۵۴ میلیونه افغانیو او د ولایتي روغتون د نویو زېږېدلو ماشومانو د درملنې څانګه د ۱۴ میلیونه افغانیو په لګښت پرانیستل شوه. همداراز د اندخوی ولسوالۍ د لویې لارې روغتیايي مرکز هم ګټې اخیستنې ته وسپارل شو.
د خبر له مخې، په سمنګان ولایت کې د حضرت سلطان ولسوالۍ عمومي روغتون د ۶۴ میلیونه افغانیو په ارزښت پیل شو او په ولایتي روغتون کې د ۶۰ میلیونه افغانیو په لګښت مجهزه ۵۰ بستریزه نسایي ولادي څانګه پرانیستل شوه. همدارنګه په کندوز ولایت کې د کلباد ولسوالۍ عمومي روغتون د ۴۸ میلیونه افغانیو په لګښت د جوړېدو چارې پیل شوې.
