کابل ټکی کام (يکشنبه، ۱۳ غویی، ۱۴۰۵ل)
د مهاجرینو ستونزو ته د رسېدنې عالي کمېسیون وايي، د شنبې په ورځ د هېواد له بېلابېلو لارو ټولټال ۸۷۹ افغان کډوالې کورنۍ له ۴۶۱۷ کسانو سره په اجباري توګه هېواد ته راستنې شوې دي.
د راپور له مخې، ډېری راستنېدونکي د ننګرهار د تورخم له لارې راغلي، چې هلته ۷۰۵ کورنۍ ثبت او بایومټریک شوې دي، ورپسې د کندهار سپین بولدک، نیمروز ورېښمو لار، هرات اسلام کلا او هلمند بهرامچه کې هم کډوال هېواد ته داخل شوي دي.
راپور زیاتوي، په همدې ورځ ۵۷۴ کورنۍ خپلو ولایتونو ته لېږدول شوې، ۸۶۸ کورنیو ته نغدي مرستې ورکړل شوې او ۸۳۶ سیمکارتونه هم وېشل شوي دي. همداراز راستنېدونکو ته روغتیايي خدمات، خوراکي توکي، د ترانسپورټ کرایه او د عامه پوهاوي بېلابېل خدمات هم وړاندې شوي دي.
