د ایران د تېلو ستره کښتۍ د امریکا له کلابندۍ تېره شوې

کابل ټکی کام (یکشنبه، ۱۳ غویی، ۱۴۰۵ل)
د نفتو د لېږد نړۍوال شرکت (ټانکر ټرکرز) خبر ورکړی چې د ایران د خامو تېلو یوه ستره کښتۍ د امریکا له سمندري کلابندۍ په بریالیتوب تېره شوې ده.
د راپور له مخې، دغه کښتۍ نږدې ۱.۹ میلیونه بېرله خام تېل لېږدوي چې ارزښت یې شاوخوا ۲۲۰ میلیونه ډالرو ته رسېږي، او اوس د اسیا–پاسیفیک سیمې ته رسېدلې ده.
ویل کېږي چې دا کښتۍ د ایران د نفتو ملي شرکت پورې تړاو لري.
تر دې مخکې ایراني رسنیو هم راپور ورکړی و چې لږ تر لږه ۵۲ ایراني کښتۍ د امریکا له کلابندۍ تېرې شوې دي، چې دا کړنې د سیمې د انرژۍ بازار او سیاسي وضعیت باندې مهم اثر غورځوي.