د جوزجان د مهاجرینو ښارګوټي د ۶۶۰۴ استوګنیزو نمرو اصلاحي پلان تصویب شو
کابل ټکی کام (يکشنبه، ۳۱ غبرګولی، ۱۴۰۵ل)
د کور او ښار جوړولو وزارت وایي، د جوزجان ولایت د مهاجرینو ښارګوټي اصلاحي پلان د وزارت د سرپرست وزیر مولوي نجیب الله حیات حقاني، له لوري تصویب او لاسلیک شو. د وزارت په وینا، په دې پلان کې د ۶۶۰۴ استوګنیزو نمرو لپاره ساحه تنظیم او ډیزاین شوې ده.
د وزارت د معلوماتو له مخې، په یاد پلان کې د سړکونو شبکې، عامه تاسیساتو، شنو ساحو، ښوونیزو او روغتیايي خدمتونو لپاره هم لازمې ساحې په پام کې نیول شوې دي.
وزارت وایي، د پلان پلي کېدل به د راستنېدونکو کډوالو د دایمي مېشتېدو او معیاري ښاري اسانتیاوو په برابرولو کې مهم رول ولري.
