کابل ټکی کام ۲۷وږی/۱۳۹۴
راپور: قدرت الله حسین
د سوريې د بېلا بېلو ښارونو په ګڼو سيمو کې په تېرو ۲۴ ساعتونو کې د دولت په بمباريو کې د وژل شويو ملکيانو شمېره له سلو تنو اوښتې ده.
دولتي الوتکو په المشهد، الکلاسة، الشعار او نورو سيمو کې په بې درېغه بمباريو د خلکو ګڼې ګوڼې په نښه کړې دي، چې له امله يې له سلو ډېر کسان وژل شوي دي او ګڼ شمېر نور ټپيان دي.
د بمباريو د سيمو د روغتونو چارواکي وايي، چې روغتونونه له ټپيانو ډک دي او د ځنو ټپيانو روغتيايي حالت ډېر خطرناک دی.
د الجزيرې خبريال د پېښو له ځايه ويلي دي، چې دولت په دې بمباريو کې نږدې هر ډول بمونه وورولي دي.
د خبريال په وينا دولت تجارتي ځايونه، بازارونه او هستوګنځايونه په نښه کوي، او چېرې چې هم د خلکو ګڼه ګوڼه ويني، بمونه پرې غورځوي.
ياده دې وي، چې د سوريې د دولت د بې درېغه بمباريو له کبله د سوريې مليونونه وګړي وطن پرېښودو ته اړ شول، چې نورو هېوادونو ته د هجرت پر مهال هم د مرګ په ګډون له ګڼو ستونزو سره مخ شول، خو دولت لا هم هلته خپلې بې درېغه بمبارۍ روانې ساتلې دي.
