د امریکا سمندري ځواکونو د یوې چورلکې د قومندان وژل کېدل تایید کړل
کابل ټکی کام (پنجشنبه، ۱۸ چنګاښ، ۱۴۰۵ل)
د امریکا سمندري ځواکونو اعلان کړی چې د چورلکې قومندان “ګابریل اډوارډز” په عربي سمندرګي کې د یوې بېړنۍ ناستې له پېښې وروسته مړ شوی دی.
د امریکايي ځواکونو د معلوماتو له مخې، د نوموړي د موندلو لپاره څلور ورځې پرلهپسې لټون وشو، خو په پای کې یې مړینه تایید شوه.
د امریکا سمندري ځواکونو ویلي، د پېښې د رامنځته کېدو د علت په اړه څېړنې روانې دي، خو تر اوسه یې نور جزییات نه دي خپاره کړي.
د یادونې وړ ده چې عربي سمندرګی په وروستیو کې د پوځي فعالیتونو له امله د نړیوالو پام ځانته اړولی، خو د دې پېښې او روانو عملیاتو ترمنځ د کوم تړاو په اړه رسمي معلومات نه دي ورکړل شوي.
