مارکو روبیو له عباس عراقچي او ایراني پلاوي د نیویارک د پرېښودو غوښتنه کړې
کابل ټکی کام (پنجشنبه، ۹ تله، ۱۴۰۵ل)
امریکايي خبري وېبپاڼې «اکسیوس» راپور ورکړی، چې د امریکا د بهرنیو چارو وزیر مارکو روبیو د ایران د بهرنیو چارو وزیر عباس عراقچي او مل پلاوي ته امر کړی، چې د امریکا او ایران ترمنځ د خبرو له ناکامېدو وروسته سمدستي نیویارک پرېږدي.
د راپور له مخې، ایراني پلاوي څو ساعته وروسته نیویارک پرېښی او دوحې ته روان شوی دی.
راپور زیاتوي، چې د قطري منځګړو هڅو هم د دواړو هېوادونو ترمنځ په خبرو کې د پام وړ پرمختګ نه دی راوستی.
بلخوا، د امریکا ولسمشر ډونالډ ټرمپ ویلي، چې له ایران سره د هوکړې یا پوځي برید په اړه باید پرېکړه وشي او په وینا یې، دا موضوع به ډېر ژر په یوه یا بله بڼه پای ته ورسېږي.
