کابل ټکی کام فرید احمد
د ګلمجم ملېشو مشر او د اشرف غني لمړي معاون جنرال عبدالرشید دوستم ویلي دي چې له طالبانو سره به د هغه مرګوني حملې حساب کوي چې په دوه ورځې وړاندې یې په کابل کې په یوه استخباراتي دفتر باندې ترسره کړه.
جنرال عبدالرشید دوستم چې د طالبانو پر وړاندې یې همېشه ماتې خوړلې ده یو ځل بیا د افغانستان شمال ته تللی دی او ګواښ یې کړی دی چې له طالبانو څخه به د هغو قربانیانو حساب کوي چې په کابل کې یې په یوه سرتيري برید کې له مینځه وړي دي.
نوموړي د خپلو خبرو په جریان کې ویلي دي چې د هغو عملیاتو په نتیجه کې چې په خپله یې شبرغان کې پیل کړي دي ۲۰۰ کلي له طالبانو څخه پاک کړي دي او لا پر مخ روان دی.
نوموړي وايي: «طالبانو له کلیو څخه تېښته کړې ده خو نه پوهېږم چې دوی چېرته تښتيدلي دي، ما خپلو امنیتي مسؤلینو ته ویلي دي په ټولو لارو کې کمینونه ونیسي او هېڅ طالب پرېنږدي له سیمې څخه ووځي.»
خو په منطقه کې یوه چارواکي زمونږ همکار ته ویلي دي، « جنرال دوستم ذهني توازن له لاسه ورکړی ده او نشي کولای چې د طالبانو پر وړاندې جګړه وګټي، هغه تشې هواوې ګزوي.»
د یوې پوښتنې په ځواب کې چې د کندز د حالاتو په اړه ترې وشوه وویل چې دا موضوع تر ده پورې اړه نلري یوازې ولسمشر کولای شي پدې اړه تصمیم ونیسي.
