کابل ټکی کام ۰۴غويي/۱۳۹۵، احمدالله مهاجر
د افغانستان د سولې د عالي شورا مرستیالې مېرمن حبیبه سرابي رسنیو ته وویل، چې نن د ګلبدین حکمتیار له لورې یو بل لوړپوړی پلاوی کابل ته راځي.
مېرمن حبیبې د دغه پلاوي مشر د ګلبدین حکمتیار زوم او د دغې ډلې د سیاسي کمېټې رئیس غیرت بهیر یاد کړ.
حبیبه وايي، د دغې ډلې په دغه درې کسیز پلاوي کې د غیرت بهیر په ګډون دوه نور کسان (قاضي حکیم او علي انصاري) برخه لري.
آغلې سرابي د څرګندونو پر مهال وویل، چې د دغه پلاوي موخه د افغانستان د ملي یووالي حکومت له دواړو مشرانو او پخوانیو جنګسالارانو سره خبرې اترې دي.
د سولې د عالي شورا مرستیالې مېرمن حبیبې وویل، چې د غیرت بهیر په مشرۍ له دغه درې کسیز پلاوي سره دوی د خبرو پلان نه لري، ځکه د دوی شورا د محمد امین کریم په مشرۍ د ګلبدین له ډلې سره په خبرو بوخته ده.
«هغوی پخپله راځي او د دې لپاره چې خبرې یو څه مخکې تللي دي، دوی غواړي چې له ځینو دوستانو سره خبرې وکړي.»
باید ووایو، د حکمتیار له لورې کابل ته رالېږل شوی پلاوی محمد امین کریم له یوې میاشتې راهیسې د سولې د عالي شورا سره په خبرو بوخت دی، چې هوکړې ته سره نږدې شوي دي.
د سولې عالي شورا ویلي وو، چې محمد امین کریم او دوی په ۲۵ مادو سره خبرې کوي، تراوسه پورې په ۲۲ مادو باندې سره هوکړې ته رسېدلي دي.
د یادولو ده، په دې وروستیو کې افغان حکومت وویل، چې د حزب ګلبدین پر هغو شرطونو به غور کوي، چې له قانون سره ټکر ونه لري.
