حکمتیار د سولې تفاهم لیک لاسلیک کړی دی

کابل ټکی کام ۰۹غبرګولي/۱۳۹۵، احمدالله مهاجر
د ګلبدین حکمتیار ډلې ته نږدې سرچینو کابل ټکي کام ته وویل، چې مشر یې د سولې هوکړه لیک لاسلیک کړی دی.
سرچینې وايي، دغه هوکړه لیک څه موده وړاندې د حزب اسلامي او د افغان حکومت د استازو له خوا نهایي شوی وو.
د ګلبدین ډلې ته نږدو سرچینو دا هم وویل، چې حکمتیار د سولې په مسوده کې دوه ځایه بدلونونه راوستي دي.
«ښاغلي حکمتیار د ملي یووالي حکومت پر ځای د افغانستان اسلامي جمهوري دولت راوستی دی، او حکمتیار صاحب داسې یوه ضمیمه سند هم لاسلیک کړی دی، چې په اختلافي مسایلو کې د پرېکړې واک ولري، په اختلافي مسایلو کې د بهرنیو ځواکونو د وتلو لپاره مهالوېش، د نوي حکومت جوړښت او د ټاکنو اړوند مسایل شامل دي.»
حکمتیار د طالبانو د مشرتابه د وژل کېدو وروسته له طالبانو څخه وغوښتل، چې د ده سره دې یوځای شي، او سوله دې وکړي، مګر طالبانو یې په غبرګون کې هېڅ هم ونه ویل.
باید ووایو، کله هم چې حکمتیار د طالبانو په وړاندې څه ووایي، طالبان یې هېڅ ځواب هم نه کوي.
د یادولو ده، که د حکمتیار له لورې د سولې دغه هوکړه لیک لاسلیک شوی وي، په نږدې څو ورځو کې به حکمتیار په کابل کې څرګند شي.