د کابل ښاروالۍ دوه جګپوړي چارواکي د فساد په تور نیول شوي

کابل ټکی کام ۰۹غبرګولي/۱۳۹۵، احمدالله مهاجر
د افغانستان د کورنیو چارو وزارت له لورې په خپره شوې خبرپاڼه کې راغلي دي، چې د پلازمینې کابل ښاروالۍ دوه جګپوړي چارواکي یې له واکه د ناوړ ګټې اخیستو او اداري فساد په تور نیولي دي.
د کابل ښاروالي وايي، چې دغه دوه جګپوړي چارواکي تېره شنبه د کورنیو چارو وزارت د لویو جرمونو د مبارزې د پولیسو له لورې ونیول شول.
د دغو جګپوړو چارواکو په تعارف کې راغلي دي، چې یو تن یې د کابل ښاروالۍ مرستیال او بل یې رئیس دی.
د کابل ښاروالي ویلي دي، چې پولیسو د دوی د جرمونو معلومولو په اړه څېړنې پیل کړي دي، چې په نږدې ورځو کې به یې پایلې اعلان کړي.
د یادولو ده، چې څو کاله وړاندې محمد ظاهر او د ښاروالۍ مرستیال محمد فقیر بهرام هم له واکه د ناوړه ګټې اخیستو په تور نیول شوي وو، چې په درو کلونو بند محکوم شوي وو.