کابل ټکی کام ۲۶غبرګولي/۱۳۹۵، احمدالله مهاجر
په تورخم کې د افغان او پاکستاني ځواکونو ترمنځ جګړې د ولسي جرګې غړي غوسه کړي دي، او د پاکستاني ځواکونو دغه عمل یې په کلکو ټکو غندلي دي.
د ولسي جرګې غړو د نننۍ عمومي غونډې په ترڅ کې د افغان ځواکونو اقدامات وستایل، او ټولو له دوی څخه خپل ملاتړ اعلان کړ.
دوی افغان ځواکونو ته ډاډ ورکړ، که یې اړتیا درک کړه، د تاسو تر څنګ به په تورخم کې د پاکستان پر خلاف وسله پورته کړي.
د ولسي جرګې یو شمېر غړو د ملي یووالي پر حکومت نیوکه وکړه، چې دوی په افغان خاوره د پاکستاني ځواکونو د تیري په برخه کې دریځ نه لري، او بې غوره دي.
دوی پر افغان خاور د پاکستاني ځواکونو د تیري ټوله پړه د ملي یووالي حکومت پر دواړو مشرانو واچوله، او زیاته یې کړه، چې دوی په خپل منځ کې د څوکیو وېشلو ته لومړیتوب ورکړی دی.
دوی همدا راز وویل، چې ډیورنډ کرښه به هېڅکله هم په رسمیت ونه پېژني، او په دې لړ کې هر ډول قربانۍ ته یې تیاري وښوده.
دوی له امریکا څخه وغوښتل، تر څو د لاسلیک شوي تړون پر موادو عمل وکړي.
