کابل ټکی کام ۳۰غبرګولي/۱۳۹۵، هلال خاورې
د پاکستان د اقتصاد وزیر پاکستانیانو ته لارښوونه کړې ده، تر څو د دالو پر ځای چې قېمتونه یې لوړ دي؛ د ښکته بیې چرګان وخوري.
د پاکستان د قومي اسمبلۍ په یوه پروګرام کې چې د ټلویزیون له لارې خپرېدو، نوموړي وویل:
«خپلو پلویانو ته ووایاست، که چېرې دال ماش ګران وي، او کیلو یې په ۲۶۰ کلدارې وي، نو پر ځای دې چرګان وخوري، چې کیلو یې په ۲۰۰ کلدارې ده.»
د پاکستان په اسمبلۍ کې مخالف ګوند د دالو د قېمتو د لوړوالي پر سر خبره راپورته کړې وه، چې نوموړي یې په اړه ځوابي وینا وکړه.
پاکستاني ټویټر کاروونکو د خپل اقتصاد د وزیر دغه څرګندونې غندلې ده.
خالد عزیز په خپله ټویټر پاڼه باندې لیکلي دي:
«د اسحاق ډار دا وینا له هغه مثال سره ښه ورته والی لري، چې وايي، که ډوډۍ ګرانه وي، کېک وخوره!»
