دبریښنایي رسنیو په اسمان کې کابل ټکی کام یو کلن شو

له کله نه چې په هیواد کې ازادو خپلواکو رسنیو په غوړیدو پیل وکړ سلګونه بریښنایي ، چاپي ، غږیزې او انځوریزې رسنۍ رامنځ ته شوې چې زیاتره یې د یو شمیر مؤسساتو او سفارتونو لخوا تمویلیږي او خپل نشراتي پروګرامونه پرمخ بیایي.

خو له بده بخته چې ځینې رسنۍ د خپلواکو رسنیو تر پردې لاندې په غیر مستقیم ډول د تمویلونکو ډونرانو د اهدافو د تحقق لپاره فعالیت کوي هغه اهداف او مکلفیتونه چې باید آزادې رسنۍ یې ولري، نه ترسره کوي.

ازادې او خپلواکې رسنۍ باید په خپل ټول توان خپلو هیوادوالو او ټولنو  ته کره او بی پرې معلومات پخپل وخت ورسوي چې د دوی پدې کار سره زمونږ ټولنه په سیاسي ، اقتصادي او فرهنګي…… او نورو ډګرونو کې د ودې او پرمختګ په لوري سوق کوي، له ټولو هغو خطراتو څخه د ټولنې وګړي خبروي چې بشري ټولنې ته متوجه وي.

خو ومو لیدل چې یو شمیر رسنیو په لوی لاس د تمویلوونکو هیوادونو او ارګانونو په دستور زمونږ هیوادوال په کلتوري او ایډیالوژیکو عرصو کې تر بریدونو او یرغل لاندې ونیول، د خپلواکۍ روحیه یې وځپله او اصیل افغاني کلتور ته یې په سپکه سترګه وکتل همدا لامل دی چې ډیری یې زمونږ د هیوادوالو په منځ کې د اعتبار له مداره ولویدې.

په هیواد او خپلو ولسونو مینو یو شمیر لیکوالانو او ژورنالیستانو وپتیله چې مطبوعاتي ازادۍ او خپلواکۍ ته په ژمنتیا د کابل ټکي کام تر نوم لاندې یوه ویب پاڼه د مطبوعاتو په آسمان کې وځلوي.

د ژورنالیزم د ټولو اصولو سره سم یې د دوه زره پنځلسم کال د جولای په میاشت کې په فعالیت پیل وکړ تر څو وکولی شي د نړۍ او هیواد د تازه پیښو، سیاسي پوځي ، اقتصادي، اجتماعي او نورو اړینو برخو کې له روانو جریاناتو څخه خپل هیوادوال په درست ډول خبر وساتي

کابل ټکی کام په خپلې یوې کلنې مودې کې   ۴۶۶۶ مطلبه نشر ته سپارلی .  او په یو کال کې یې په فیسبوک پاڼه کې څه د پاسه ۶۰۰۰۰ مینه وال پیدا کړی دی.

که نورې، لس کلنې، ۸ کلنې او ۳ کلنې ازادې او خپلواکې رسنۍ د یو کلن کابل ټکي کام سره مقایسه شي، نو په ډاګه به شي، چې کابل ټکي کام یو حیرانوونکی پرمختګ کړی دی.

کابل ټکی کام چې ریښتونې ولس پاله او اسلام پاله رسنۍ ده، نه یوازې اسلامي معلومات، سیاسي لیکنې، ادبي لیکنې، پر حالاتو تبصرې، شعرونه او مرکې هم خپروي.

کابل ټکي کام ویب پاڼه  په بشپړه ازادي سره یې خپلو ټولو مینوالو ته موقع ورکړی چې د مطالبو په اړه یې خپلې تبصرې ولیکي او د ټولو خوښوونکو نظریاتوته د ازاد ژورنالیزم په رڼا کې احترام لري.

همدا لامل دی چې نه یوازې په هیواد کې یې مینوال پیدا کړل بلکې په امریکا، اروپایي او آسیایې هیوادونو کې زیات شمیر پښتانه او دري ژبي مینوال او کتونکي پیدا کړي دی

کابل ټکی کام یوازې اسلام ، خپل ولس او ټولنې ته ځان ژمن ګڼي او بس

(اداره)