امریکا افغانستان ته نور ۸۰۰ عسکر رالیږي
کابل ټکی کام ۱۳۹۵ زمری ۶ زرغون خوږیاڼی
د امریکا متحده ایالتونو پرېکړه کړې، چې افغانستان کې د ترهګرۍ په وړاندې جګړې ته د هوايي ځواک لپاره نور ۸۰۰ امریکايي سرتیري راولیږي.
د یادې ډلې مشر جنرال وین ډبلیو جونیور ویلي، چې دا سرتېري د کانزاس په یوه نظامي اډه کې په ښه توګه روزل شوي او د پلیو عملیاتو تر څنګ په هوايي بریدونو کې هم پوره وړتیا لري.
یاد امریکايی جنرال وايي، چې دا سرتيري به ډېر زر افغانستان ته د یو لړ اپاچي الوتکو سره لاړشي او هلته به په بېلا بېلو هوايي عملیاتو کې برخه واخلي.
د هغه په وینا یادو سرتېرو ته د اپاچي الوتکو د کارونې روزنه ورکړل شوې، چې په افغانستان کې تر ټولو اغیزناکې او ګټورې الوتکې دي.
د امريکا ولسمشر بارک اوباما افغانستان ته ۸۰۰ نور سرتیري په داسې حال کې استوي، چې څه موده وړاندې اوباما په افغانستان کې د امریکايي او ناټو ځواکونو جګړه ییز ماموریت ته نور واک هم ورکړ او د امریاکايي قومندانانو په غوښتنه یې د خپلو سرتېرو شمېر لا زیات کړ. اوباما دا هم وویل، چې زما تر واکمنۍ پورې به امريکايي او ناټو پوځيان په افغانستان کې جګړه وکړي.
سیمه اییزو سیاسي مبصرینو د اوباما دا پریکړه په کلکو ټکو غندلې ده او ویلي یې دي، چې امریکا په افغانستان او نوره اسلامي نړۍ کې د مسلمانانو په وژنه لاس پورې کوي او دې وژنو ته یې بېلا بېل نومونه ورکړي دي.
