سیګار: طالبانو په افغانستان کې ۵ سلنه نور پرمختګ کړی
کابل ټکی کام ۱۳۹۵ زمری ۸ زرغون خوږیاڼی
د افغانستان د بيارغونې لپاره سيگار يا د څار امريکايي اداره وایي، وسله والو طالبانو تېرو څلورو مياشتو کې د افغانستان ۵ سلنه نوره خاوره هم په خپله ولکه کې راوستې ده او اوسمهال د افغانستان په ۳۵ سلنه خاوره باندې حاکمیت لري.
په افغانستان کې د نړیوالو ځواکونو د عمومي قوماندان جنرال جان نیکلسن په وینا ډیری هغه سیمې چې د طالبانو په ولکه کې دي، لرې کلیوالې سیمې دي.
د سيگار له لوري په خپاره شوي راپور کې راغلي، چې د امریکايي پوځ د معلوماتو پر اساس څلور مياشتې وړاندې افغان حکومت د افغانستان د خاورې ۷۰،۵ سلنه خاوره په واک کې درلوده، چې اوسمهال دغه سلنه ۶۵،۶ ته را ټيټه شوې ده.
د سیګار په راپور کې ويل شوي، چې طالبان د افغانستان له ۳۵۷ ولسواليو څخه ۱۹ ولسوالۍ په بشپړ ډول په واک کې لري.
راپور په افغانستان کې د امریکايي چارواکو په حواله لکي، چې د طالبانو له خوا د نیول شویو سیمو د ساتنې لپاره قوي اقدامات، له فرصتونو څخه پرځای او پر وخت استفاده او په نیول شویو سیمو کې د استحکاماتو ټینګول د طالبانو د بري او د افغان حکومت د ماتې علتونه دي.
همداراز په راپور کې ویل شوي، چې طالبان د بدخشان، کندوز، بغلان، جوزجان، هلمند په گډون گڼو نورو ولايتونو کې مهمې او ستراتيژيکې سيمې په خپل کنترول کې لري.
د افغانستان د دفاع وزارت وياند دولت وزيري یاد راپور مني خو وايي، چې طالبانو يوازې لرې پرتې سیمې تر خپل واک لاندې راوستي او ستراتيژيکې سيمې نه شي نيولی.
