د عربي اماراتو الوتکه دوبۍ کې د ناستې پرمهال نسکوره شوې
( کابل ټکی کام ۱۳۹۵ زمری ۱۳) زرغون خوږیاڼی
د عربي متحده اماراتو هوایي شرکت یوه الوتکه، چې ۲۷۵ مسافر پکې سپاره وو، د دوبۍ په هوایي ډګر کې د ناستې پرمهال نسکوره شوې ده.
الوتکې د ناستې پر مهال اور اخیستی او لیدل کیږي، چې تور لوګي ترې پورته کیږي.
د دوبۍ حکومتي رسنیو ویلي، په الوتکه کې ټول سپاره کسان روغ رمټ له الوتکې ویستل شوي او تر اوسه د مسافرینو د ټپي کېدو راپور نه دی ورکړل شوی.
د عربي اماراتو بویینګ ۷۷۷ ډوله الوتکه د هند له ترېواندروم نه دوبۍ ته الوتنه درلوده.
د دوبۍ “فلایټ ټریډر – ۲۴” سایټ ویلي، تر دې پېښې وروسته، د دوبۍ هوایي ډګر ته ټولې بهرنۍ او کورنۍ الوتنې ځنډول شوي دي.
تر اوسه پورې د الوتکې د نسکورېدلو لامل نه دی څرګند شوی.
