(کابل ټکی کام ۱۳۹۵ زمری ۱۵) زرغون خوږیاڼی
د اې پي پاکستاني خبري اژانس ویلي، چې د پاکستان تحريک طالبانو د وياند قاري سيف الله په وينا، په لوګر کې د پاکستانۍ نسکورې شوې عمله ددوی په لاس کې ده.
قاري سیف الله د ای پي خبري اژانس ته ویلي، چې د چورلکې عمله د ددوی د یو قومندان ادم کوچي په قبضه کې دي.
ویاند زیاته کړې ، چې د چورلکې یو پیلوټ سخت ټپي دی او نور ټول نیول شوي کسان یې د افغان ځواکونو له بریده خوندي سیمو ته رسولي دي.
په یاده قضیه کې ویاند د خپل ۱ ملګري وژل او د ۲ نورو د ژوبلیدو خبر هم ورکوي، چې د کسانو د ساتنې پر وخت پرې جیټ الوتکو بمباري کړې ده.
د تحریک طالبانو ویاند د ای پي خبري اژانس ته دا هم ویلي، چې کیدای شي په برمته شویو کسانو کې د پاکستان د استخباراتو کارکوونکي هم وي.
د لوګر ولایت د ازرې ولسوالۍ ولسوال حميدالله حميد ويلي: چورلکه کې سپاره اووه واړه کسان طالبانو نيولي، هغه دا هم منلې چې حکومت په هاغه سيمه واک نه لري چرته چې چورلکه غورځيدلې او اور پرې لګيدلى.
د یادونې وړ ده چې تیره ورځ د لوګر ولایت په ازره ولسوالۍ کې یوې MI_17 ډوله چورلکې بیړنۍ ناسته وکړه، چې له ناستې سره سمدستي یې اور اخیستی او عمله یې د ځايي ولسوال په وینا طالبانو له ځانه سره خوندي سیمو ته بیولې ده، وروسته معلومه شوه چې چورلکه د پاکستان د پنجاب ایالت اړوند ده.
په چورلکه کې په ۵ پاکستاني ریټایر افسران دي او ۱ روسي فضايي لارښود شامل دي.
تراوسه لا پوره روښانه نه ده، چې چورلکه ویشتل شوې او که د تخنیکي عوارضو پر بنا یې بیړنۍ ناسته کړې، خو د پاکستان د پوځ ویاند عاصم باجوه وايي، دا چورلکه د تېرې پنجشنبې په ورځ د ازبکستان له لارې روسیې ته پر لاره وه، چې په لوګر ولایت کې له تخنیکي ستونزې سره مخامخ شوه او ناسته یې وکړه.
نوموړی دا هم وايي، چې برمته شویو کسانو کې يو روسی فضايي لارښود او نور د پوځ متقاعد یا ریتایرډ افسران دي.
عاصم باجوه په افغانستان کې د بهرنیو ځواکونو د غوڅ ماموریت له مشر جنرال نیکولسن سره هم په دې اړه خبرې کړې او له هغه څخه د چورلکې د عملې موندلو لپاره مرسته غوښتې ده.
جنرال نیکولسن پېښه تائيدوي او د هر ډول مرستې ژمنه یې کړې ده.
همدا رنګه باجوه د افغان ولسمشر څخه هم په دې اړه د پوره مرستې او همکارۍ غوښتنه وکړه، ولسمشر غني او افغان ملي پوځ د چورلکې د غړو خوندي کولو لپاره لاس په کار شوي دي.
د افغانستان د دفاع وزارت ویاند جنرال دولت وزیري وویل، چې پاکستان د افغانستان د بهرنیو چارو د وزارت له لارې د ملکي هوایي چلند له وزارت څخه د افغانستان له فضایي حدودو څخه د یوې چورلکې د تیریدلو اجازه اخیستې وه، اوس پلټنې روانې دي، ترڅو دا څرګنده شي چې پریوتی چورلکه همغه ده، چې دمخه پرې تفاهم شوی وو او که نه!.
د لوګر د ازرې ولسوال حميد الله حمید اې پي ته ويلې وو، چې د هېليکاپټرې د لوېدو وروستو شپږ کارکونکي وسله والو طالبانو له ځان سره بیولي دي.
بلخوا د وي او ای اشنا راډیو په یوه راپور کې ویلي، چې د یادې نسکورې شوې هلیکوپترې ټوله عمله د افغان طالبانو په لاس کې ده.
((دطالبانو يو لوړپوړي کمانډر دنوم نه څرګندولو په شرط يوې بهرنۍ خبري ادارې سره خبرو کې ویلي، چې ددغه چورلکې اووه واړه کسان هغوی نيولي او دهغوی د خوشې کولو لپاره مذاکرات هم روان دي. افغان طالب قومندان ویلي، چې د نیول شویو کسانو خيال ساتل کيږي، ورته چای، خوراک او هر څه ورکول کیږي، هغه ويلي چې د افغان حکومت يا امريکايي پوځ څخه دمرستې دغوښتو هيڅ ګټه ځکه نشته چې طالبان په ټوله ولسوالۍ قبضه لري)).
خو د پاکستان د پوځ ویاند عاصم باجوه ویلي، چې له هرې ممکنې رسمي او غیر رسمي لارې به د پاکستاني اتباعو د خلاصون لپاره هلې ځلې وکړي.
همدارنګه د روسيې د چورلکو جوړولو کمپنۍ ویلي، چې د پاکستان ملکي Mi-17 چورلکه چې پيلوټ يي پاکستانی دی، د ترميم لپاره د «روسيي چورلکې» يوه شرکت ته روانه وه.
روسیي کمپنۍ تائید کړې ده، چې په یاده چورلکه کې یو روسي تبعه شخص هم موجود وو، چې د۵ پاکستانیو اتباعو سره یو ځای وسله والو نیولي دي.
یادې روسیي کمپنۍ ویلي، چې د چورلکې د بيړنی ناستي علت به وڅیړل شي.
