کاپیسا: د ۲۶۰ میلیونه ډالرو په ارزښت د بریښنا بند جوړیږي
(کابل ټکی کام ۱۳۹۵ زمری ۱۷) زرغون خوږیاڼی
په کاپيسا ولایت کې د ۲۶۰ میلیونه ډالرو په ارزښت د برېښنا بند جوړیږي، ویل کیږي چې یاد بند به د دغه ولایت په شمول به څو ګاونډیو ولایتونو ته هم برېښنا ورکړي.
د کاپيسا د والي ویاند قیس قادري نن وول، چې کاپيسا ولایت په نجراب ولسولاۍ د باغ دره په سیمه کې د اوبو او برېښنا وزارت تخنیکي او مسلکي ټیم سروې کړی ده.
ویاند وايي: د یادې سروی له مخې به د ۲۶۰ میلیونه ډالرو په ارزښت یوه ستر برېښنا بند جوړ شي، چې یو افغاني شرکت د دغه بند د جوړولو لپاره تیاری ښودلی او سیمه يې هم کتلې ده.
دا بند به۲۵۰ میګاواټه برېښنا د تولیدولو ظرفیت ولري.
قادري ویلي، چې د دغه برېښنا بند څخه به د کاپيسا ټولو ولسوالیو په شمول پنجشیر، پروان او د کابل ځېنې برخو ته برېښنا ورکړل شي.
قیس قادري ویلي، چې د دغه بند په جوړلو په لومړي پړاو کې به سلګونه ځوانانو ته د کار زمینه برابره شي او له یاد بند څخه به د پنجشیر، سالنګ او غوربند اوبه هم کنترول شي او له دې بند څخه به ډیری دښتې او کرنیزې ځمکې خړوبې شي.
