کابل: د امریکايي پوهنتون یو امریکايي او یو استرالیايي استادان تښتول شوي
(کابل ټکی کام ۱۳۹۵ زمری ۱۸) زرغون خوږیاڼی
په كابل كې د امريكا د متحدو ايالتونو د پوهنتون دوه استادان، چې یو یي امریکايي او بل استرالیایي دی، د نامعلومو وسله والو لخوا تښتول شوي دي.
د کورنيو چارو وزارت وياند صديق صديقي پېښه تائيد کړې، ده ويلي دي، چي تیر ماښام ۸:۳۰ بجې دغه دواړه پروفیسران امریکايي پوهنتون ته نږدې د ملي اردو په يونيفورم کي وسله والو کسانو يرغمل او تښتولي دي.
ویاند ویلي، چې د امریکايي پوهنتون بهرني استادان پرته له امنیتي کسانو څخه بهر په چکر وه، چې د پېښې ښکار شول.
د کابل امنیه قوماندان عبدالرحمن رحیمي وايي، چې د امریکايي پوهنتون بهرني استادان په دارالامان سیمه کې له خپل موټر څخه د وسلو په زور ښکته شوي او تښتول شوي دي، اوس په دې اړه پلټنې روانې دي.
بلخوا په کابل کي د امريکا سفارت ویلي، چې دواړه پروفیسوران د پوهنتون دننه څخه د وسلې په زور ویستل شوي دي؛ خو د نورو معلوماتو ورکولو څخه یې ډډه کړې.
همدارنګه په سیمه کې عیني شاهدانو ویلي، د وسله والو پوځي جامې پر تن وې او د پوهنتون لومړۍ دروازې ته له ننوتو وروسته یې دغه کسان د وسلو په زور وتښتول.
په کابل کي د ستراليا سفارت هم تائيد کړې ده، چي يو استراليايي استاد تښتول شوی دی.
