کندز: طالبانو د دهقان قشلاق سیمه او دوه تنه عسکر ژوندي نیولي دي.

کابل ټکی کام (زمری۲۱مه، ۱۳۹۵ل) بصیراحمد پاڅون
د کندز په امام صیب ولسوالۍ کې نن او پرون درنې نښتې شوي، طالبان د زیاتو بریاوو دعوی کوي او وایي : د عمري عملیاتو په لړ کې یې نن سهار څلور بجې د دهقان قشلاق په سیمه کې پر دولتي ځواکونو پراخ بریدونه کړي او دولتي ځواکونه یې تیښتې ته اړ کړي دي. طالبان زیاتوي چې نوموړي سیمه یې په بشپړه توګه پخپله ولکه کې اخیستي او له دولتي ځواکونو یې زیات شمیر وسلې او مهمات او دوه تنه ژوندي عسکر نیولي دي. طالبان وایي چې د ولسوالۍ مرکز ته نږدې یو مهم پوځي پنډ غالی محاصره کړی دی.
د کندز ولایتي چارواکو تر دې مهمال د دې جګړې په اړه څه نه دي ویلي.
پرون هم په همدې ولسوالۍ کې طالبانو دوې پوستې نیولې وې او د کندز په مرکز کې یې د ملي امنیت رئیس له خپلو دوو تنو ساتونکو سره سخت ټپي ټپي کړی و.
د کندز د ولایتې شوری او ولسي جرګې وکیلان د کندز ولایت د امنیتي وضعیت څخه سخت اندیښمن دي او وایي چې په داسې حال چې په کندز ولایت کې د ملي اردو زیات شمیر عسکر وجود لري خو بیا هم طالبان په پوره قوت سره موجود او هره ورځ پرمخ روان دي.