(کابل ټکی کام ۱۳۹۵ زمری ۲۱) زرغون خوږیاڼی
د هرات ولایت امنیتي چارواکي وايي، چې د شینډنډ ولسوالۍ په مرکز کې نن غرمه مهال د ملي اردو یوې پوستې ته نږدې چاودنه وشوه، چې په کې د اردو ۲ عسکر ووژل شول او ۶ نور ټپیان شول.
د هرات والي ویاند جیلاني فرهاد وویل، چې چاودېدونکي توکي په یوه زرنج موټرسایکل کې ځای پرځای شوي و، کله چې د ملي اردو ځواکونو غوښتل هغه شنډ کړي، د سړک پرغاړه بله زوروره چاودنه رامنځته شوه.
جیلاني وویل، چې په چاودنه کې د اردو۲ عسکر ووژل شول او ۳ نور ټپیان شول، ده په وژل شوو کې د ۲ملکي وګړو یادونه هم وکړه، چې ۴ نور ټپیان شوي دي.
بلخوا د هرات د امنیه قومندانۍ مطبوعاتي دفتر په خپره شوې خبر پاڼه کې ویلي، چې په یاده چاودنه کې د اردو ۲ وژل شوي او ۶ نور ټپیان دي.
تر اوسه پورې طالبانو رسنیو ته په دې اړه څه نه دي ویلي.
