په بغلان کې د عطاءمحمد نور په پلوۍ ۲۰۰ تنه ملېشه جوړه شوه
(کابل ټکی کام ۱۳۹۵وږی ۲) الماس خدرخېل
په بغلان ولايت کې د ولايتي شورا مرستيال محبوب الله غفاري د عطاء محمد نور په ملاتړ ۲۰۰ تنه په ياد ولايت کې مسلح کړي دي.
د دغو ۲۰۰ سوو نامسؤله ملېشو قومندان وايي، چې نوموړي کسان يې، د بغلان ولايت له درېيو ولسواليو د محبوب الله په امر راټول کړي او وسلې يې ورته وېشلي.
قومندان وويل، چې نوموړې ملېشه د عطاء محمد نور په ملاتړ راټوله شوې او د هغه په امر هر قسم مبارزې ته تياره ده.
تر دې دمه د بلخ ولايت سرپرست عطاء محمد نور د هغه د ملاتړ لپاره د دې کسانو د مسلح کولو په اړه څه نه دي ويلي.
د يادونې وړ ده، چې له تېرو څو اونيو راپدېخوا د اجرائيه رئيس او ولسمشر اشرف غني تر مينځ د واکونو پر سر اختلافات زيات شوي، نو د اجرائيه رياست پلويان او شمال ټلواله کوښښ کوي، چې خپلې ملېشې جوړې کړي او دولت په يوه نظامي قوه ووېروي.
