(کابل ټکی کام ۱۳۹۵ وږی ۱۳) زرغون خوږیاڼی
واشنګټن پوسټ امریکایي ورځپاڼه د اشرف غني د کارکردګیو او سیاست په اړه لیکنه کې وايي، چې په افغانستان کې ډېرې ستونزه شته؛ خو د دې هېواد ولسمشر ښايي د یادو ستونزو یوه برخه وي.
واشنګټن پوسټ لیکي، یو ماښام په ارګ کې له بهرنیو ژورنالېستانو سره په یوه غیر رسمي لیدنه کې له ولسمشر اشرف غني څخه پوښتنه وشوه، چې څنګه امکان لري چې په هېواد کې له دومره ستونزو او بحرانونو سره سره ارام او بېغمه اوسۍ؟ د ورځپاڼې په وینا ولسمشر له موضوع ووت او زیاته یې کړه: هغه څه چې دی خواشینی کوي، پر وخت د غونډو نه ترسره کېدل دي.
همدارنګه واشنګټن پوسټ ورځپاڼې د حکومت د ځینو لوړ پوړو چارواکو له قوله لیکلي دي، هر هغه څوک چې په غونډو کې د ولسمشر له پرېکړو سره مخالفت وښيي او نیوکه پرې وکړي، هغه تحقیر او سپکوي.
ورځپاڼه لیکي چې ولسمشر غني په ټیټه کچه د دولتي مامورینو د استخدام په پروسه کې مداخله کوي.
ورځپاڼې د کابینې د یوه وزیر له خولې چې نه غواړي نوم یې څرګند شي، لیکلي دي چې ولسمشر وزیران ټاکلي دي، خو واکونه یې نه دي ورکړي او دا هغه څه دي چې د اصلاحاتو مخه یې نیولې ده.
یاده ورځپاڼه لیکي، چې ولسمشر اشرف غني قومي مشرانو او مخورو سره لیدو ته وخت نه لري او دا هغه څه دي چې پخواني ولسمشر حامد کرزي ورته ډېر پام کاوه، چې له امله یې نوموړی واتوانېد چې له لسیزو راهیسې د بېلابېلو عقایدو پر بنسټ وېشل شوې ټولنه سره بیا پیوند کړي.
واشنګټن پوسټ ورځپاڼه زیاتوي، چې د اشرف غني حکومت د وسله والو له سختو بریدونو، په هېواد کې له زیاتېدونکې بېوزلۍ، اقتصادي رکود او د هېواد عامو خلکو او سیاسي مخالفینو له بې ساري نیوکو سره دی.
ورځپاڼه وايي چې اشرف غني ته د هېواد عام خلک هیڅ او سپک ښکاري او په سیاست کې هم د یو کوچني مدیریت وړتیا نه لري.
