(کابل ټکی کام ۱۳۹۵ وږی ۱۴) زرغون خوږیاڼی
د کندوز ولایت د حوزوی روغتون رئيس نعیم منګل وايي، چې په تیرو دوه هفتو کې ۲۳۶ امنیتي عسکر په ټپي حالت کې دې روغتون ته راوړل شوي دي.
منګل وايي، چې په دې ټپیانو کې ۲۶غیر نظامیان او د خواجه غار ولسوالۍ او د تخار د درقد ولسوالۍ امنیتي ځواکونه شامل دي.
د ویسا ورځپاڼې د راپور په اساس د کندوز د حوزوي روغتون یوه غړي چې نه یې غوښتل نوم یې واخیستل شي وویل، چې د زمري د میاشتې له ۲۵ څخه د وږي تر ۷ تاریخ پورې دکندز د جګړې له لومړۍ کرښې څخه ۲۱۰ امنیتي عسکر په ټپي حالت کې دې روغتون ته راوړل شوي دي.
د کندز د والي ویاند سیدمحمود دانش وايي، چې تر اوسه پورې د کندز د جنګ له لومړۍ کرښې څخه کوم موثق او باوري خبر په دې اړه نه دی ور رسیدلی.
خو د کندز د والي ویاند ټينګار کوي، چې امنیتي ځواکونو له تجربه کارو او پوهو جنرالانو څخه د تلفاتو د مخنیوي او د دشمن د نا څاپي حملې په اړه زده کړې حاصلې کړي او امید لري چې په راتلونکي کې به د تلفاتو په شمیر کې د پام وړ کمی راشي.
په کندوز کې د پوځي چارو کارپوه ډګروال ظاهر وايي، چې په جګړه کې د سالم مدیرت د نه شتون له امله او د طالبانو د بریدونو د ناسم تحلیل له امله د امنیتي ځواکونو په تلفاتو کې زیاتوالی راځي.
ظاهر خبرداری ورکوي، که د امنيتي ځواکونو د بې پروايۍ له مخکې او د تلفاتو د مخنيوي لپاره د طالبانو په وړاندې د پر مختللې جګړې پروګرام په ښه توګه ونه سنجول شي، د حکومتي عسکرو مورال ته په سخته ضربه ورسیږي.
دا په داسې حال کې ده چې څو ورځې وړاندې د ناټو د قاطع ماموریت ویاند جنرال نیکولسن وویل، چې د تیرې میلادي میاشت په جګړو کې تر ۹۰۰ زیات حکومتي عسکر وژل شوي دي.
