ترکیې د لوی اختر د رارسیدو په مناسبت د غزې خلکو ته مرستې ولیږلې
(کابل کام ۱۳۹۵ وږی ۱۵) زرغون خوږیاڼی
دترکیې د رسنیو په حواله، د فلسطین د غزې ښار ته په مرستو بار د ترکیې دویمه کښتۍ ورسیده.
ترکي رسنیو ویلي، چې په مرستو بار کښتۍ پرون د شپې په نهو بجو د اسراییلو اشدود بندر ته ورسیده.
دوی وايي، چې دا مرستې به د لاریو په واسطه د ترکیې د سرې میاشتې او بیړنیو مرستو او ناورین د ادارې تر څار لاندې غزې ته انتقال او په اړینو خلکو به وویشل شي.
د ترکیې لخوا په یادو مرستو کې غزې خلکو ته وړه، غوړي، وریجي، بوره، حبوبات او د ژوند لومړني ضروریات شامل دي.
پر دې سربیره د غزې ماشومانو ته بایسکلونه، قرطاسیې(کتابچې او قلمونه)، جامې او د لوبو سامانو نه هم استول شوي دي.
د ترکیې د بیړنیو مرستو او ناورین ادارې د ښې ګڼو د څانګې ریس جنګیز اکن دلته خبریالانو ته وویل چې « په غزه کې ددې بشري مرستو د ویشلو سره د ترکیې بشري او وجداني مسولیت پایته نه رسیږي. د ولسمشر اردوغان د هدایت په مطابق به د غزې د خلکو سره مرستو ته دوام ورکړو. د ترکیې د بیړنیو مرستو او ناورین اداره به پدې اړه خپل مسولیتونه په ډیره ښه توګه پر ځای کړي . »
ترکیي چارواکي وايي، چې دوی غزه نه هیروي، له کوچني اختر مخکې هم ترکیې د غزې له خلکو سره مرستې کړې وې.
