دفاع وزارت: ۱۳ تنه د ملي اردو عسکر وژل شوي
(کابل ټکی کام ۱۳۹۵وږی ۲۰) الماس خدرخېل
د دفاع وزارت پر ویب پاڼه په خپره شوې خبرپاڼه کې ویل شوي، چې په تېرو څلور ویشتو ساعتونو کې د هیواد په بېلا بېلو برخو کې د عملیاتو پر مهال د ملي اردو ۱۳ تنه منسوبینو خپل ژوند له لاسه ورکړی دی او د مقابل لوري هم ۹۴ تنه وژل شوي دي.
دفاع وزارت د ملي اردو عسکرو د ټپي کېدو په اړه معلومات نه خپروي.
په خبرپاڼه کې ويل شوي چې د ملي اردو سرتيري د مخالفينو سره په وسلوالو نښتو او ماين چاودنو کې وژل شوي دي.
په خبرپاڼه کې ويل شوي دي، چې ياد عمليات يې د هېواد په ۱۵ ولايتونو کې ترسره کړي دي، چې پکې يې د دولت ۴۹ تنه مخالفين ټپيان کړي هم دي.
طالبانو تر دې دمه د خپلو ملګرو د وژل کېدو او ټپي کېدو په اړه څه نه دي ويلي، خو تر دې وړاندې يې ورته ادعاوې ردې کړي دي.
