(کابل ټکی کام ۱۳۹۵وږی ۳۱) الماس خدرخېل
چارواکو ويلي چې په ننګرهار کې يې په هوايي بريدونو کې ۳۳ داعش وسلوال وژلي دي.
د ننګرهار والي وياند عطاءالله خوږياڼي رسنيو ته وويل: هوايي بريدونه يې تېره شپه ناوخته په اچين او کوټ ولسواليو کې ترسره کړي دي.
هغه زياته کړه، چې د هوايي بريدونو له امله ۳۰ وسلوال په کوټ او ۳ تنه نور يې په اچين ولسوالۍ کې په نښه کړي او له منځه وړي دي.
داعش وسله والو تر دې دمه په دې اړه رسنیو ته څه نه دي ویلي.
ياده دې وي، چې څه موده وړاندې په نازيانو ولسوالۍ کې د امريکايي ځواکونو په هوايي بريدونو کې لسګونه اولسي خلکو ته مرګ ژوبله اوښتې وه.
په يوه جلا خبر کې ويل شوي، چې تېره ورځ د ننګرهار په غني خېلو کې دوه تنه قومي مشران د نامعلومه وسلوالو له لوري ووژل شول، په همدې تړاو د ننګرهار ولايت نه په خپره شوې خبرپاڼه کې ويل شوي چې پېښه تېره ورځ غرمه مهال د سياچوب په سيمه کې رامنځته شوې ده.
ځايي اوسېدونکو ويلي، چې وژل شويو قومي مشرانو په خپله سيمه کې د داعش پرضد د سيمه ييزو پوليسو (اربکيانو) د پوستو جوړولو غوښتنه کړې وه.
د قومي مشرانو د وژل کېدو مسؤليت تر دې دمه چا نه دی منلی.
