کابل ټکی کام ۰۷میزان/۱۳۹۵، احمدالله مهاجر
تېره ورځ د افغانستان پخواني ولسمشر حامد کرزي د بي بي سي سره د خبرو پر مهال وویل، چې طالبان هم افغانان دي او حق لري چې د هېواد پر ځینو سیمو واک ترلاسه کړي، د نوموړي دغو څرګندونو د یو شمېر دولتي کارکوونکو غبرګونونو را پارولي دي، چې له دې جملې څخه ډاکټر عبدالله عبدالله هم د ولسمشر حامد کرزي د دغو څرګندونو په غبرګون کې توند الفاظ کارولي دي.
ښاغلي کرزي بي بي سي ته وویل، چې حکومت هم افغان دی او طالبان هم افغانان دي او طالبان حق لري، چې د حکومت پر خلاف وجنګیږي.
ډاکټر عبدالله عبدالله نن چهارشنبه په یوه خبري غونډه کې وویل:
«کرزی چې دغه فتوا نن ورکوي، نو څنګه یې په خپله دیارلس کلنه واکمنۍ کې دغه جګړه پر مخ بوتله.».
د عبدالله د څرګندونو له مخې، که د کرزي وروستیو څرګندونو ته پاملرنه وشي، نو د کرزي دیارلس کلنه واکمني مشروع نه وه.
نوموړي وویل، حامد کرزی دغه خبرې د عقدې له مخې کوي او باید خلکو ته یې په اړه ځواب ووايي.
د حامد کرزي د دغو څرګندونو په غبرګون کې ګڼ اعتراضونه راپارېدلي دي، چې د پکتیا ولایت د ځوانانو د اصلاح بنسټ رئيس، کرامت الله هم د نوموړي د څرګندونو په غبرګون کې وویل:
«هر څوک چې په هر رنګ سره د افغانستان دښمن ته ملګری ووايي، هغه هم د افغانستان دښمن دی.».
