کابل ټکی کام (چهارشنبه، ۲ غویی، ۱۴۰۵ل)
د افغانستان د بهرنیو چارو وزارت مالي او اداري مرستیال ډاکټر محمد نعیم د اروپایي اتحادیې له ځانګړي استازي جیلز برټرنډ سره په کتنه کې د دواړو لورو پر سیاسي، اقتصادي او سوداګریزو اړیکو او د همکاریو د پراختیا پر لارو چارو خبرې کړې دي.
د بهرنیو چارو وزارت په خبرپاڼه کې راغلي چې په دې لیدنه کې د اروپایي اتحادیې له بشري مرستو مننه شوې او ټینګار شوی چې دا مرستې دې د دوامدارو پراختیایي پروګرامونو پر لور واړول شي څو کاري فرصتونه زیات او د خلکو اساسي ستونزې حل شي.
په کتنه کې دواړو لورو د ستونزو د حل لپاره ډیپلوماسي او خبرې اترې غوره لاره بللې او د متقابلو اړیکو پر توازن یې ټینګار وکړ.
دغه راز اروپایي استازي ويلي چې د افغانستان د صادراتو لپاره د اروپا بازارونه پرانستي دي او افغاني محصولات په ځانګړي ډول وچه مېوه په اروپا کې ښه بازار لري.
