(کابل ټکی کام ۱۳۹۵تله ۱۵) الماس خدرخېل
له تېرو څو ورځو راهيسې په کندوز ولايت کې د طالبانو او افغان ځواکونو د جګړو له امله ولسي خلکو ته مرګ ژوبله اوښتې او په ياد ولايت کې روغتونونه تړل شوي دي.
د کندوز د عامې روغتيا رئيس ډاکټر عالم وايي، په دغه ښار کې يواځې يو ۲۰۰ بستريز روغتون فعاله و، چې هغه هم د طالبانو او دولتي ځواکونو د جګړو له امله وتړل شو.
هغه زياته کړه، چې اوس مهال په کندوز ښار کې هيڅ ډول روغتون شتون نه لري او په جګړو کې ډېری وخت ولسي وګړو ته زيان رسېږي، چې د درملنې لپاره يې کومه مرسته نه کېږي، ډاکټر عالم له مرستندويه ټولنو غوښتي چې د ټپيانو د درملنې په موخه دې زر ترزره بېړنۍ مرستې وکړي.
د سرچينو له مخې د کندوز په يادو جګړو کې د دولتي توغنديو په لږېدو سره ولسي خلکو ته ډېره مرګ ژوبله او مالي زيانونه رسېدلې دي.
سرچينه زياتوي، چې د کندوز د عامې روغتيا او حوزوي روغتون د معلوماتو له مخې په دې جګړه کې تر دې دمه ۲۰۰ تنه ټپيان روغتون ته ور وړل شوي دي.
په ورته وخت کې تېره شپه د کندوز په یوه لوی مارکيټ کې د دولتي ځواکونو د توغنديز بريد له کبله اور بل شو چې په پايله کې يې نوموړی مارکیټ په بشپړ ډول وسوځېدلو او سوداګرو ته يې په ميلونونو روپیو تاوان رسولی دی.
بل پلو د کندوز اوسېدونکي وايي، چې په ښار کې د اوبو او برېښنا د نه شتون له امله خلک کوښښ کوي چې لرې پرتو سيمو ته کډه شي.
د يادونې ده، چې په کندز کې تېرو څو ورځو کې دا دوهم سوداګریز مارکېټ دی چې د دولتي ځواکونو په توغندیو د اور خوراک ګرځي.
وړمه ورځ د کندز ښار د قالینو مارکیټ هم د دولتي ځواکونو د توغندیو هدف وګرځید، ګڼ دوکانونه یې په اور کې لولپه شول او خلکو ته په ملیونونه ډالره مالي زیان واوښت.
