(کابل ټکی کام ۱۳۹۵تله ۱۹) الماس خدرخېل
په ترکيه کې تېره ورځ يو موټربم بريد ترسره شوی، چې د اتو ملکيانو په ګډون ۱۰ تنه پوځي سرتېري وژل شوي دي.
موټربم چاودنه د ترکيې حقاري ولايت شيمدينلي ولسوالۍ اړونده سيمه کې د امنيتي ځواکونو په مرکز رامنځته شوې ده.
چارواکي وايي، چې په پېښه کې د ۲۷ تنه پوځيانو په ګډون ګڼ شمېر ملکي وګړي هم ټپيان شوي دي.
د پېښې ټپيان د تداوۍ په موخه د یوکسک قوا او شيمدينلي ولسواليو روغتونونو ته وړل شوي دي.
د ترکيې لومړي وزير د بريد پړه د پيکاکا په ډلې اچولې او ويلي يې دي، چې د ۵ ټنو چاودېدونکو توکو نه بار موټر يې د امنيتي ځواکونو د مرکز تر څنګ چاودولی دی.
هغه زياته کړه، چې ترکيه به د پيکاکا، داعش ډلو پر خلاف عملياتو ته دوام ورکړي.
ياده چاودنه د عراق او ايران ګډې پولې ته نږدې هغه سيمه کې شوې، چې ډېری وګړي يې کردان دي.
د يادونې ده، چې کردي وسلوال په ترکيه کې د خپلواکۍ غوښتنه کوي او له تېرو څو کلونو راهيسې ترکيې سره په جګړه کې ښکېل دي.
