(کابل ټکی کام ۱۳۹۵ تله ۱۹) عزیر اسدخیل
د سعودي عربستان او عربي ایتلاف ځواکونو د یمن لخوا نه د سعودي پر الستین سیمه باندې د دوه ویشتل شويو توغندېو په هوا کې د خنثی کولو اعلان کړی، له بل پلو نه سعودي عربستان خپل تازه دم نظامي ځواکونه د یمن پولې ته وروسته له هغې استولي دي چې حوثی یاغیانو او پلویانو یې پر سعودي خاوره د یرغل کولو دړکه وکړه،(( څو ورځې وړاندې د ایران مذهبي مشر آیت الله خامنیی هم سعودي عربستان ته ورته ګواښ کړی دی. ژباړن)).
د سعودي عربستان د ایتلاف مشرتابه ویلي دي، چې د تیرې یکشنبې په ماښام یو له هغو دوه توغندیو چې د شړل شوي ولسمشر علي عبدالله صالح او حوثي ملیشو لخوا ویشتل شوي وو د سعودي عربستان د طائف ښار یې په نښه کړی و.
مشرتابه زیاته کړې ده چې د دوی ځواکونو وکولای شول چې دواړه توغندي له زیان اړولو پرته په هوا کې خنثی کړي او هم یې هغه دستګاه له مینځه یوسي چې دغه دوه توغندې یی وار کړي وو، سعودي عربستان په سملاسي توګه خپل ځواکونه د یمن پولې ته استولي دي.
د سعودي خبري چینل هغه انځورونه خپاره کړل، چې خپل جنګي تازه دم ځواکونه ښئ چي د سعودی د الحرس الوطني اړوند ځواکونه يې د نجران سیمې ته رسیدلي دي چې په پرمختللیو نظامي وسایلو سمبال دي، څو په پوله کې د پرتو ځواکونو مرسته وکړي او هم ورسره په جګړه کې ګډون وکړي.
او دا یادونه یې هم کړې ده چې دغه ځواکونه به د امنیت راوستلو په پراخو عملیاتو کې ګډون وکړي، او په تیزۍ سره به د هغو عملیاتو مخه هم ونیسي چې په چټکۍ او په پرلپسې توګه د مداخله ګواښ لري او په مختلفو سیمو کې به جګړه پر مخ بوځي.
دغه دوه توغندي وروسته له هغې د یمن لخوا پر سعودی عربستان ویشتل شوي دي چې شړل شوي ولسمشر علي صالح او د حوثیانو مشر عبدالملک الحوثي ګواښ وکړ چې پر سعودي خاوره به خپل بریدونه ځکه زیات کړي چې د هغه برید غچ واخلي چې د تیرې شنبې په ورځ د صنعاء په پایتخت کې د فاتحې په مراسمو کې د دوی یو شمیر پیژندل شوي مشران د سعودي اتحادیانو لخوا په یوه درنه چاودنه کې ووژل شول او ځینی نور ټپیان شول.
د عربي ایتلاف ځواکونو مشرتابه ویلي دي چې دوی د امریکایي متخصصینو په ګډون تحقیقات شروع کړي دي چې د تیرې شنبې په ورځ د صنعاء په ښار کې د فاتحه خوانۍ په غونډه کې د چاودنې په اړه څیړنې ترسره کړي او هم یې د قربانیانو د کورنیو سره د خواخوږئ څرګندونه کړې ده.
په عین حال کې د صالح او حوثي ایتلاف د صحت عامه وزارت سرپرست ناصر العرجلي ويلي دي چې د فاتحه خوانۍ په وژل شویو کې یو هم د صنعاء د پایتخت د امنیت مشر عبدالقادر هلال دی، هغه زیاتوي چې په ټپیانو کې د حوثي او صالح د ایتلاف د کورنیو چارو وزیر جنرال جلال الرویشان، د مرکزي امن د قواو قومندان جنرال عبدالرزاق المروني او د قبایلو د شؤونو او اصلاحاتو رییس احمد صالح دیود هم شامل دی.
هغه دې ته اشاره وکړه چې د فاتحه خوانۍ په دغه صالون کې یو شمیر نورو نظامي قومندانانو هم ګډون درلود چې تر اوسه پورې تري تم دي.
د الجزیرة نه په مننې.
