سرليکنه
د دفاع وزارت په هره غونډه کې وايي: دولتي ځواکونه د دفاع توان لري او په هر وخت کې د مخالفينو ځواب ويلی شي.
ددې ادعا ثبوت د يوې اوونۍ راپديخوا د کندز په جګړه کې طالب وسله والو دفاع وزارت ته ورکړ او دا یې ثابته کړه، چې يواځې د کندزنه، بلکې د هلمند، فراه، بغلان او نورو ولايتونو په څير په کندز کې دولتي ځواکونه د طالب وسله والو پر وړاندې د مقاومت توان نه لري.
پر کندز د جګړې په دوېمه ورځ د کندز امنيتي مسئولينو وويل، چې د ښاري اوسيدونکو د سر او مال په خاطر نه غواړو په وسله والو مخالفينو د هوا له لارې عمليات وکړو؛ خو د کندز د ښار د امنيتي چارواکو هغه دعوه هم له منځه ولاړه، همغه ښاريان چې د کندز د ښار د دفاع په ناتوانۍ کې پلمه کيدل نه یې سرونه په امن پاتې شول او نه مالونه، هر څه یې د نشت برابر شول .
د مخه به چې ازادو رسنيو د جګړو په اړه راپورنه ورکول او د دولتي ځواکونو د حوصلې د بايللو وينا به یې کوله نو دا ده چې په کندز کې د يوې اونۍ راپدېخوا جګړه دوام لري، دا یې ثابته کړه چې د کندز امنيتي ځواکونه د ښار د دفاع توان له لاسه ورکړی دی او د خپلو سرونو په دفاع کې هم ګمان نه کوم چې کامياب شي.
هر افغان يو وياړ لري چې د نورو وياړونو ترڅنګ يو د نورې نړۍ په څير په خپل پوځ وياړ دی، په افسوس سره دا وياړ مونږ له لاسه ورکړی دى، که دا وياړ افغان پوځ لرلای نو د ګوتو په شمير کمونستانو به په افغانستان کې د ثور د اوومې کودتا نه وه کاميابه کړې.
ولسمشر محمد اشرف غني سره زيات شمير افغانان مخالفت لري، مخالفتونه پر خپل ځای خو په دې یو څه د خوښې وړ دى چې په ډير مهم او پر ځاې وخت کې حقيقت وايي، هغه دا چې تيره ورځ یې په يوه تلويزيوني وينا کې وويل: په هلمند، اروزګان ، کندوز او نورو سیمو کې نا امنۍ د سرتیرو د کمزورۍ له امله نه بلکې علت یې دا دی چې نامسلکي کسان پر پوځي دندو ګومارل شوي دي.
ولسمشر محمد اشرف غني که لږ څه نور هم حقيقت ته مخ ور وګرځوي او پلټنه وکړي بيا به په بله تلويزيوني وينا کې ووايي، چې د تيرو دوو کلونو راپديخوا په يادو ولايتونو کې د جګړې دوام د دولتي پوځونو چې د مخالفو وسله والو سره په جګړه اخته دي که د ښارونو دفاع ونه کړای شي د طالبانو د بريدونو پر مهال خو خپل سرونه د جګړې له سيمې ایستلی شي؛ خو په دفاع وزارت کې خيالي پوليس او پوځ زمونږ ناکامي ده چې په جګړه کې د پوځ شمير زيات ښوول کيږي؛ خو ښکيل بيا د ښودل شوي شمير نيمايي هم نه پوره کوي.
اشرف غني چې د مخه کومه انديښنه لرله هغه اوس نه لري، د مخه به د امنيتي پوځونو په روحيه ډاډ من نه و، اوس یې د غير مسلکي اصلي ټکى په ګوته کړ، چې مسلکي نظامي کسان د جګړې پر مهال سر ورکوي؛ خو سنګر او پوسته نه ورکوي او غير مسلکي په ډيره کمه بيه سنګر يا پوسته پلوري .
که د اشرف غي دې ټکي ته پام وکړو چې غير مسلکي قوماندانان د دفاع په وزارت کې ګمارل شوي دي، ډيره ګرانه ده چې د بروکسل له غونډې راوړي ډالر په خپل ځای مصرف کړای شي.
لکه څرنګه چې اشرف غني د دفاع په وزارت کې په غيرمسلکيتوب اعتراف وکړ، همدا حال د نورو وزارتونو هم دى، په نورو وزارتونو کې خو ټوله معامله په مصلحتونو ده .
د اشرف غني ځینې ويناوې دي چې د کندز جګړه یې دوامداره کړې ده.
سولې ته تمه لرونکو افغانانو دکندز له جګړې تعبير کړه، چې اشرف غني او ترې راچاپيره شمالي ټلواله هيڅ وخت سوله نه غواړي ځکه غني د کندز د جګړې په دوام وويل: د هغو طالبانو سر ه سوله نه کوي چې واک یې د بل په لاس کې دى، طالبان هم په همدې ټنګارکوي او د کابل د موجوده ادارې سره سوله نه کوي، وايي په کابل کې موجوده اداره بلواکه اداره ده.
دې موضوع ګيرۍ ته په کتو سره د کندز جګړه له ځانه سره ډير څه لري، که د کندز د جګړې دوام د دفاع په وزارت کې غير مسلکي کسان ګمارل ومنو د ولسمشر انديښه به په خپل ځای ثابته شي؛ خو ترڅنګ یې نور لاملو نه هم شته چې ولسمشر ته به وروسته څرګند شي.
