(کابل ټکی کام ۱۳۹۵ تله ۳۰) عبید وصال
د ننګرهار ولایت د والي ویاند عطاالله خوږیاڼي ویلي، چې تیره ورځ داعش وسله والو د پچیراګام ولسوالۍ په پاس پچير سیمه کې د عامو خلکو په وړاندې جګړه پیل کړې او ۲۳ کورونه یې سوځولي دي.
ویل کیږي چې داعش وسله والو غوښتل په پاس پچیر سیمه خپل حضور پیداکړي او دغه سیمه په زور لاندې کړي چې د سیمې د اوسیدونکو سره په جګړه کې ښکیل شول.
عطاالله خوږیاڼی زیاتوي، چې داعش وسله والو د پاس پچیر لومړني کورونه تر خپلې ولکې لاندې راوستي او دغلته يې د ملکي وګړو ۲۳ کورنه هم سوځولي دي.
د خوږیاڼي په وینا په نښته کې تر دا مهاله ۴ ولسي وګړي وژل شوي او ۲۹ نور ټپیان شوي دي.
نوموړی ويلي، له تېرې ورځې راهیسې د ملکي خلکو سره په نښتو کې د داعش ډلې ۲۲ وسله وال وژل شوي، خوږیاڼی وايي چې نن سهار په سیمه کې جنګي الوتکو په داعش ډلې هوايي بریدونه کړي او ۴۵ داعشیان یې وژلي دي.
ځینو رسنیو ویلي دي، چې د سیمې اوسیدونکو د مرستې لپاره طالبان هم سیمې ته رسیدلي او د داعش ډلې سره یې سخته جګړه پیل کړې ده.
د سیمې یو اوسېدونکي امریکا غږ ته ویلي، چې اوسمهال ولسي وګړي او د طالبانو مرستندویه ډلې له داعش وسله والو سره په جګړه بوخت دي، ((دغه ځايي وګړی چې خپل نوم نه ښيي وايي چې داعش وسله وال د خلکو په کورنو ورننوتي او له کلیو څخه جګړه کوي)).
ویل کیږي چې په سیمه کې جګړه اوس هم روانه ده او کیدای شي د مرګ ژوبلې شمیره نوره هم زیاته شي.
داعش وسله والو د پچیر په سیمه مخکې هم څو وارې حملې کړي او دغلته یې په لسګونو عام وګړي وژلي دي، چې د سیمې د کلکې کرکې وړ ګرځیدلي دي.
داعش وسله والې ډلې چې ډيری یې پاکستاني دي، څه وخت مخکې د شینوارو په کوټ ولسوالۍ کې هم د عامو خلکو کورونو ته اور ورته کړی و او په لسګونو کورونه یې سوځولي وو.
تر اوسه پورې داعش په دې اړه څه نه دي ویلي.
