(کابل ټکی کام ۱۳۹۵ تله ۳۰) زرغون خوږیاڼی
د پاکستان د غوره لیګ ۲۰۱۷(PSL) کرکټ شل اوریزه سیالیو کې د افغانستان لوبډلې دوه لوبغالي محمد نبي عیسی خیل او شهزاد محمدي اخیستل شوي، چې د پاکستاني لوبډلو په ګټه به لوبې ترسره کړي.
د پاکستان په سوپر لیګ سیالیو کې د نړۍ د کرکټ غوره لوبغاړي د زیاتو ډالرو په بدل کې لوبیږي، ویل کیږي چې په ۴۱۴ لوبغاړو کې شهزاد محمدي او محمد نبي عیسی خیل هم غوره شول.
د پاکستان د غوره لیګ سیالۍ کې پنځه لوبډلې ( پیښور ځلمي، کراچۍ کنګس، لاهور قلندر، اسلام اباد یونایټد او کویټه ګلاډياټورز) سره لوبیږي.
په یادو لوبډلو کې شهزاد محمدي به د پيښور زلمي په لوبډله کې د کیپر او بیټسمین په توګه ولوبیږي.
همدارنګه محمد نبي عیسی خیل به د کویټې په لوبډله کې ولوبیږي.
یادې لوبې به د دوبۍ په شارجه ښار کې ترسره شي او د لوبې وروستۍ لوبه(پای لوبه) یا فاینل به د پاکستان په لاهور ښار کې ترسره شي.
د افغانستان د کرکټ بورډ مرستیال ویلي دي، چې یادو لوبغاړو ته به له ۴۰ څخه تر ۵۰ زره ډالرو پورې د پاکستان د سوپر لیګ لخوا ورکیږي.
ویل کیږي چې محمد نبي عیسی خیل او شهزاد محمدي د بنګله دیش په غوره لیګ سیالیو کې هم اخیستل شوي دي.
