سوداګرۍ وزارت: يوه نيمه ربع کې شل سلنه صادرات لوړ شوي دي
(کابل ټکی کام ۱۳۹۵لړم ۱۹) الماس خدرخېل
د سوداګرۍ او صنايعو وزارت تمه ښکاره کړې، چې سږ کال به د هېواد سبزيو، وچو او تازه ميوو صادراتو کې د پام وړ زياتوالی راشي.
سوداګرۍ او صنايعو وزارت وياند مسافر قوقندي ازادۍ راډيو ته وويل: (زموږ صادرات په درېیمه او څلورمه ربعه کې ډېرېږي او زموږ څېړنې ښيي چې د تېرکال په پرتله سږکال چې څومره صادرات لرو هغه د میوو او سبزیو برخه کې ۲۰ فیصده ډیر والی ښيي).
دغه وزارت وايي، افغانستان تېر کال څه باندې دوه لکه ټنه سبزيجات، وچه او تازه ميوه د ۲۴۴ ميلونو ډالرو په ارزښت بهرنيو هېوادونو ته صادره کړې ده.
بايد وويل شي، چې د افغانستان اکثره تولیدات د کال په درېیم او څلورم فصل کې رسېږي او په دې برخه کې د مڼو، انارو، انګورو، جلغوزیو، بادامو او ځيني نورو میوو حاصلاتو ته تر ټولې ډيرې هیلې وي.
افغانستان هرکال شاوخوا د ۱۰ میلیارده ډالرو په ارزښت واردات کوي، خو افغان حکومت ژمنه کړې چې له دې هېواده به د صادراتو اندازه هم لوړوي.
د سوداګرۍ او صنایعو خونې ویاند صیام الدین پسرلی که څه هم په دې برخه کې ځینې پرمختګونه تائیدوي خو وايي چې لاهم سوداګر له ستونزو سره مخ دي.
