مالي: د القاعده ډلې په موټربم بريد کې ۶۰ سرتيري وژل شوي
(کابل ټکی کام ۱۳۹۵ مرغومی ۳۰) الماس خدرخیل
د مالي افريقايي هېواد چارواکي وايي، چې په يوه موټربم بريد کې د دغه هېواد ۶۰ سرتيري وژل شوي او ۱۱۵ نور ټپيان دي.
د چارواکو په وينا حمله دغه موټربم بريد په شمالي ښار ګاو کې په يوه پوځي کمپ ترسره شو.
د بريد مسئوليت د شمالي افريقا لپاره د القاعده څانګې المغرب په غاړه اخيستی او ويلي يې دي، چې ”دا هغو خلکو ته سزا ده چې له فرانسوي اشغالګرو سره همکاري کوي“.
د معلوماتو له مخې، په دغه پوځي کمپ کې هغه سرتېري او د مخالفو وسلهوالو ډلو غړي اوسي، چې د دې هېواد په شمالي دښته کې د ملګرو ملتونو د سولې د تړون له مخې ګزمې کوي.
څه موده مخکې د دغه هېواد مخالفینو ګواښ کړی و او ويلي يې و چې”فرانسه به د مالي هېواد پر شمال، مسلمان میشتو سیمو د برید لپاره درنه بیه پرې کړي“.
اوسمهال په مالي افريقايي هېواد کې د فرانسې له دوه زرو زيات پوځيان ميشته دي.
