(کابل ټکی کام ۱۳۹۵مرغومی ۳۰) الماس خدرخیل
د فراه ولايت فراه رود ولسوالۍ څخه يوې امنيتي سرچينې کابل ټکی کام ته د نوم نه ښودلو په شرط ويلي، چې په ياده ولسوالۍ کې له درې ورځو راهيسې د طالبانو او امنيتي ځواکونو تر منځ په وقفه يي ډول وسلوالې نښتې روانې دي.
د سرچينې په وينا په دې نښتو کې له شلو زياتو سرتيرو ته مرګ ژوبله اوښتې او د سرتيرو يو تعداد موټرو ته يې زيان اړولی.
بل پلو وسلوالو طالبانو د يادو بريدونو مسئوليت په غاړه اخيستی او په يوه خبرپاڼه کې يې ويلي، چې د يادې ولسوالۍ بازار، تونک او عبدالله خېلو سيمو کې بيګا ناوخته په امنيتي ځواکونو جګړه کړې او پکې يې ۸ تنه عسکر وژلي.
طالبان وايي، په ټوله درې ورځنۍ جګړه کې ۱۲ دولتي سرتيري وژلي او ۷ نور يې ټپيان کړي دي.
د طالبانو له خوا په خپره کړې خبرپاڼه کې ويل شوي، چې په ټوله جګړه کې د دوی ۳ تنه وسلوال وژل شوي او دوه نور ټپيان دي.
د سيمې يو تن اوسېدونکي نوراغا وايي، چې د دواړو لوريو په نښتو کې شاوخوا ۱۰ تنه ښځې او ماشومان هم ټپيان شوي دي.
