تاجکستاني چورلکې د بدخشان په څو ولسوالیو کې پروازونه او ناستې کوي

کابل ټکی کام ۰۶عقرب/۱۳۹۴
احمدالله مهاجر
د ځايي سرچینو په وینا چې د بدخشان په څو ولسوالیو کې تاجکستاني چورلکې تګ را تګ کوي، او د دریو ولسوالیو اړوندو سیمو کې پروازونه او په یو شمېر سیمو کې ناستې هم کوي.
 سرچینه وايي چې دغه کار د سیمو خلکو ته پوښتنې او شکونه پیدا کړي دي، او له حکومت څخه یې په وړاندې د اقدام کولو جدي غوښتنه کړې ده.
د یوې باوري سرچینی د خبر له مخې چې چورلکې په هغه دریو ولسوالیو کې ( واخان، شغنان او اشکاشم) کې ناستې کوي، چې له تاجکستان هېواد سره شریکه پوله لري.
ځايي سرچینې وايي، که څه هم د یادو سیمو امنیت هم ښه ندی، خو دغه چورلکې په یادو سیمو کې ناستې کوي او په وړاندې یې هیڅ غبرګون ندی ښودل شوی.
د سرچینې په وینا چې ښایي سیمه ییز قوماندانان د طلا او قېمتي ډبرو په بدل کې ور څخه خوراکي توکي ترلاسه کوي، خو په اړه یې شواهد او اسناد نشته.
د افغانستان روڼتیا د څار نومې بنسټ کال وړاندې ویلي وو چې د ورځې دوه کیلو طلا له بدخشان ولایت څخه د تاجکستاني چورلکو په مټ قاچاقیږي.
ځایي خلک هم د تاجکستاني الوتکو پروازونه او ناستې تأییدوي، او د موخې په اړه یې مالومات نلري.
خو چارواکو د ځینو رسینو له لارې دغه خبر رد کړی دی، او په اړه یې نا خبري ښودلې ده.
د بدخشان د والي ویاند احمد نوید فروټن وايي چې دوی تر اوسه په دې اړه هېڅ راپور نه دی ترلاسه کړی.