ترکیه کې د داعش احتمالي برید شنډ شوی
(کابل ټکی کام ۱غبرګولی۱۳۹۶) محمد حارث
د ترکیې په پلازمېنه انقره کې د داعش د احتمالي برید مخه نیول شوې، د ترکیې امنیتي ځواکونو پرون یکشنبه د مۍ د میاشتې په ۲۱ نېټه په پلازمېنه انقره کې د داعش وسله والې ډلې په یو مرکز چاپه اچولې.
د ترکیې امنیتي ځواکونو په هغه کور چاپه اچولې چې د داعش ډلې پکې پراخ فعالیت کاوه او د یو ستر برید پلان یې پکې ترتیباوو، امنیتي ځواکونو په دغه چاپه کې دوه تنه داعش وسله وال هم له منځه وړي.
د انقرې والي نن خبري رسنیو ته وویل “امنیتي ځواکونو تیره ورځ د سترې فاجعې مخه ونیوله.”
داعش ترهګرې ډلې غوښتل چې پرون د عدالت او پراختیا ګوند په کانګرې برید تر سره کړی خو مخکې له دې چې خپل شوم هدف ته ورسیږي د امنیتي ځواکونو لخوا له منځه یوړل شول.
