ولسمشر ټرمپ او غني د لومړي ځل لپاره سره وکتل
(کابل ټکی کام ۱۳۹۶غبرګولی ۱) الماس خدرخېل
د امريکا متحده ايالاتو ولسمشر ټرمپ او افغان ولسمشر اشرف غني د لومړي ځل لپاره په سعودي عربستان کې سره کتلي دي.
دواړو ولسمشرانو په دغه کتنه کې د افغانستان د امنيت او د ترهګرۍ سره د مبارزې په وړاندې بحث او خبرې کړي دي.
د سپينې ماڼۍ له لوري په خپره شوې خبرپاڼه کې ویل، چې په دغه کتنه کې ولسمشر ټرمپ په افغانستان کې د ترهګرو په وړاندې د مبارزې ستاينه کړې او دغه راز افغان ځواکونه يې زړور بللي دي.
دا لومړی ځل دی چې ولسمشر ټرمپ د افغان ولسمشر اشرف غني سره ويني.
دا په داسې حال کې ده، چې اوس مهال امريکايي چارواکي په دې غور کوي چې افغانستان ته د جګړې لپاره نور ځواکونه وليږي.
د امريکا دفاع وزير جيز ماټيس يوه مياشت مخکې افغانستان ته د خپل سفر پر مهال ويلي و، چې ۲۰۱۷م کال به د افغان ځواکونو لپاره خونړی کال وي.
افغانستان ته د نورو امريکايي پوځيانو د رالېږلو خبره داسې مهال کېږي، چې پوځي کارپوهانو او د افغانستان يو شمیر وکيلانو د نورو عسکرو د رالېږلو سره مخالفت څرګند کړی دی.
د ورکړل شويو شميرو له مخې اوس مهال په افغانستان کې ټول ۱۳۴۰۰ بهرني پوځيان ميشت دي، چې کله کله د افغان ځواکونو سره په عملياتو کې برخه اخلي.
د امريکايي چارواکو په وينا د افغانستان دولت دا مهال پر ۵۷ سلنه خاورې حاکميت لري او پاتې نوره برخه باندې وسله وال طالبان حاکم دي.
