د سوریی ډموکراتیک ځواکونه د سوریې په مینځ الرقة ولایت کې خپل پرمختګ ته دوام ورکوي او ورځ تر بلې پر اسلامي تنظیم باندی خپله کلابندي لا ټینګوي.
دې ځواکونو چې زیاتره یې سوریایی کُردي وسله وال دي وروسته له هغې چې د هنیدة ښار یې ونیو اوس یې پر المنصورة ښار باندې خپله ولکه ټینګه کړې ده، همدا راز یی د الفرات په سیند باندې د البعث د اوبو بند هم نیولی دی.
کُردي ځواکونو له دې لاسته راوړنو وروسته اسلامي تنظیم د لویدیځ، ختیځ او شمال لوریو نه کلابند کړی او یواځینی خلاص لوری یې جنوب پاتی دی.
دا په داسی حال کې چې د سوریې دموکراتیکو ځواکونو اعلان کړی چې د الرقة جګړه به څو ورځې وروسته پیل شي چې دا څرګندونې د یکشنبې د ورځې د ترکیې د صدراعظم بن علي یلدرم له څرګندونو سره څرګند توپیر لري چې ویلي یی وو د الرقة ولایت بیرته نیولو جګړه همدا اوس پیل او روانه ده او د امریکا متحده ایالتونو انقرې ته په دې اړه اطلاع هم ورکړې ده.
د ترکیې خپرني وسایلو د یلدرم له قوله ویلي دي چې د الرقة ولایت عملیات چې له یوې اوږدې مودې راهیسې پلان شوي وو په دې وروستیو کې په روان جون میاشت کې پیل شوي دي او زیاته کړې یې ده چې د امریکا متحده ایالتونو دې هیواد ته د عملیاتو نه مخکې په دې اړه اړوند معلومات هم ورکړي دي.
خو د عملیاتو د تاریخ په اړه دغه توپیر د ترکانو، کُردانو او سوریایانو تر مینځ یواځینی اختلاف نه دی او تر شا یې د امریکا اداره هم د الرقة په عملیاتو کې همغږې ده.
امریکایانو د سوریي دموکراتیک ځواکونه په الرقة ښار کې د اسلامي تنظیم د ځواکونو د ټکولو او پوپنا کولو لپاره ګمارلي دي او د دې لپاره د ترکانو د احتجاج سره سره بیا هم د امریکا د اداری رئیس ډونالډ ټرمپ وسلې ورکړي دي.
له بل پلوه د سوریې د دموکراتیکو ځواکونو ویاندې ویلي دی چی د دوی سرتیرو د الرقة ښار لویدیځ ته د الخاتونیة او القحطانیة زراعتي سیمې لاندې کړي دي او اوس یې اسلامي تنظیم له ختیځ او شمال نه تر کلابندۍ لاندې راوستی دی، او یواځينی لوری چې ورته خلاص دی هغه جنوبي لوری دی.
د سوریی دموکراتیک ځواکونه د الرقة ښار لومړي کلي لویدیځ لوري ته رسیدلي دی دا وروسته له هغې چې د اسلامي دولت تنظیم ځواکونو له دغه ځایه شاتګ وکړ او د الرقة ولایت لویدیځ کې یې د ښار ختیځ مسکنة سیمې ته په تګ مجبور شول.
د دې تر څنګ د سوریي رژیم ځواکونو پر مسکنه باندې هم خپله ولکه ټینګه کړه، مسکنة یو له له هغو مهمو ښارونو څخه ده چې د اسلامي دولت ځواکونو پرې د هیواد شمال ته پر حلب ولایت باندې له ولکې وروسته ولکه ټینګه کړې وه.
مسکنة سیمه چې د أسد د بند سره په لویدیځ خوا کې پرته ده څه موده وړاندې د سوریایی رژیم د ځواکونو په یوه ستر یرغل کې چې د روسي بمبار یې ملاتړ کاوه نیولې ده او د اسلامي تنظیم وسله وال یې د ختیځ حلب ته شړلی دي.
له بل پلوه د سوریی رسمي خبري آژانس (سانا) ویلي دی چی د سوریې رژیم ځواکونو په تیرو ۲۴ ساعتونو کې د اسلامي تنظیم له وسله والو ځواکونو سره تر سترې جګړې وروسته د تدمر ختیځ ته په البادیة السوریة سیمه کې نږدې ۱۴۰۰ کیلو متره مربع سیمه له خپلو مخالفینو څخه د نړیوال ائتلاف په مرسته او ملاتړ نیولی ده.
په همدې حالت کې یو شمیر خبري سرچینو الجزیرة چینل ته ویلي دی چی د اسلامي تنظیم ځواکونو د دیرالزور په ښار کې پر سوریایی ځواکونو پراخ یرغل پیل کړی دی.
سرچینو زیاته کړې ده چې د دیر الزور ښار په غربي خوا کې د اسلامي تنظیم د توپونو د ویشتلو په پایله کې یو زیات شمیر کسان مړه او ټپیان شوي دي. اسلامي تنظیم همدې یرغل ته ورته یو بل یرغل او برید هم تیره ورځ د دیر الزور په لویدیځ کې د رژیم پر ځواکونو پر مختلفو ځایونو ترسره کړی و او ویی کولای شول چې د ښار په داخل کې یو زیات شمیر ځایونه ونیسی چې له جملې نه یې مشهور ځای دوار البانوراما سیمه هم ده.
اما اسلامي تنظیم بیا پخپله اعلان کړی دی چې دوی وکولای شول د سوریې له رژیم نه ۳۵ کسان هغه وخت ووژني چې د تدمر جنوب ته یې په العباسیة او تلال الغراب او الحماد سیمه کې د حمص ختیځ ته پر ولاړو ځواکونو دوه موټر بم چاودونې ترسره کړې.
