دولسي جرګې یوشمیر غړو دهغې خونړۍ چاودنې په تړاو چې د روژې په میاشت کې یې سلګونو افغانانو ته مرګ ژوبله واړوله د افغانستان ملي امنیت اداره او ټول امنیتي نهادونه ښکیل او ملامت بللي او په وینا یې امنیتي ادارې د خلکو د سرساتنه کې پاتې راغلي دي.
د جرګې د غړو په وینا، که څه هم امنیتي بنسټونه د دغه برید په اړه کره استخباراتي معلومات په لاس کې لرل خو دوی و نه توانیدل چې د برید مخنیوی وکړي.
په ولسي جرګې کې د غزني ولایت د خلکو استازي محمد عارف رحماني وویل، چې دغه چاودنې تر ۵۰۰ زیات کسانو ته مرګ ژوبله واړوله او نویو راپورونو ته په کتو سره، په امنیتي او استخباراتي بنسټونو کې کمزورتیا او ضعف له اندازې زیات دی.
دا پداسې حال کې ده چې تیره ورځ الماني رسنیو د المان د استخباراتي چارواکو له قوله راپور ورکړی ؤ، چې دوی ۵ میاشتې مخکې د دې برید په تړاو ټول معلومات درلودل او پدې هم پوهیدل چې انفجاري توکي به د کثافاتو په تانکر کې ځای پځای وي، د دوی په وینا دوی همغه وخت د افغانستان استخباراتي ارګانونه په جریان کې واچول او حتا دبرید څخه څو ورځې مخکې یې هم ورته یادونه کړې وه خو هغوی د یاد برید په مخنیوي کې هیڅ ونکړل او المانیانو خپل سفارت له برید نه څو ورځې وړاندې وتړلو.
په همدې حال کې ځینې استازي د امریکا پر سفارت هم نیوکې کوي او وایي، چې که څه هم د امریکا سفارت د دغو بریدونو په اړه کره معلومات په لاس کې لري خو دوی امنیتي ځواکونو سره مرسته نه کوي ترڅو د دغو بریدونو مخه ونیول شي.
طالبانو همغه وخت یاد برید رد کړی ؤ او هغه یې د استخباراتي ادارو کړنه بللې وه.
الماني رسنیو ویلي په ټانکر کې شاوخوا ۱۰۰۰۰ ټنه چاودیدونکي توکي ځای په ځای شوي ؤ.
د چارو شنونکي په یاد برید کې د آلمان سفارت هم ګرم بولي دوی وایې هغوی چې دومره زیات معلومات درلودل ولې یې مخنیوی نه کاؤ؟
خو د پړې ګوته د افغانستان امنیتي ادارو ته ځکه نیول کیږي چې هغوی د برید په اړه له ټول جریان څخه خبر ؤ خو بیا یې هم د دې چارې مخه ونه نیوله او په لوی لاس یې ستره ویجاړي رامنځته کړه.
په یاد برید کې شواخوا ۱۵۰ تنه ووژل شو، او سلګونه نور ټپیان ؤ
