(کابل ټکی کام ۱۳۹۶چنګاښ ۲۰)
د افغانستان د مشرانو جرګې غړي وايي، چې د سولې عالي شورا کې تر اخرې اندازې فساد دی او بايد چې منحل شي.
د يادې جرګې دوهم مرستيال محمد اصف صديقي رسنيو ته ويلي، چې د سولې شورا په نوم پيسې ورکېږي او هر غړی يې په يو وخت څو بېلابېلې دندې هم لري.
هغه له حکومته غوښتنه وکړه، چې په سولې شورا کومې پیسې لګوي بايد د امنيت په برخه، پوهنې او يا نورو ټولګټو پروژو کې دې ولګول شي، ځکه چې تر اوسه دغې شورا کومه لاسته راوړنه نه ده لرلې او زياتوي چې په دغه شورا کې تر اخري اندازې فساد دی او بايد چې منحله شي.
دا څرګندونې په داسې حال کې کېږي، چې نن د سولې عالي شورا وويل چې د انتخاباتو پر مهال به په ناامنه سيمو او ولسواليو کې اوربند وکړي او د سولې لپاره به داسې تګلاره غوره کړي چې د طالبانو سالمو غوښتنو ته مثبت ځواب وويل شي.
تر اوسه د سولې عالي شورا د مشرانو جرګې د دغو څرګندونو په اړه غبرګون نه دی ښوودلی.
-الماس خدرخېل-
